Sa iyang mensahe, emosyonal nga gipasalamatan ni PB Gabo si Mayor Klarex sa gihatag nga higayon nga mahatagan og katumanan ang iyang gipangayo nga dakong proyekto.
“Daghan maka-benefit nga mga mag-uuma ug mga mamaligyaay sa daplin nga taga-Brgy Pagatpat,” dugang ni PB Gabo.
Siya mipasabot nga priority nga makapamaligya sa maong merkado ang mga rehistradong molupyo sa Brgy. Pagatpat kay alang man kanila ang proyekto nga iyang gipangayo ni Mayor Klarex.
Si Mayor Klarex, sa iyang bahin, namahayag nga gihimo niya kini nga public market kay iyang nakita nga dako kini og tabang dili lang sa ekonomiya sa barangay, lakip na sa mga molupyo.
Matud sa mayor nga iyang paningkamutan nga mahuman gayud ang kinatibuk-ang Pagatpat Public Market kay alang man kini nga proyekto sa katawhan sa maong barangay.
Samtang, gipasalamatan usab ni Mayor Klarex ang 20th City Council pinangulohan ni Vice Mayor Jocelyn Rodriguez nga kanunay’ng nagsuporta sa iyang mga proyekto.
Lakip sa mitambong sa maong kalihokan mao sila si City Councilors Yan Lam Lim nga maoy chairman sa Committee on Economic Enterprises, Ma. Lourdes Gaane, ug Romeo Calizo, mga Department Managers sa City Hall, ug mga barangay officials.
(News and photo courtesy of CIO CDO)