Nagpabiling lig-on sa iyang baruganan si Mayor Oscar Moreno nga walay lockdown sa syudad hinuon iyang gimando ang pagpasira sa tanang mga malls ug pagpatuman sa pito ka oras nga curfew sugod kagahapong adlawa. Apan bisan pa man nga temporary unang ipasira ang mga malls, kadtong establisemento nga nagtanyag sa basic necessities gitugtan ra nga mag-operate ubos sa kondisyon nga mopatuman sa social distancing, etiquette sa pag-ubo ug hygiene protocols.
Ang mga establisemento nga magpadayon sa pagbukas mao ang supermarkets, grocery ug convenience stores, pharmacies ug restaurants. Ang mga internet cafes temporary usab nga sirad-an. Sa pikas bahin, ang curfew sa tanang edad gikan alas diyes sa gabii (10pm) hangtud alas singko sa buntag (5am) gisugdan usab kagahapon, Marso 17 diin nag-exempt niadtong nagtrabaho sa night shift sama sa business process outsourcing compnies.
Gipasabot ni Mayor Moreno nga ang pagpasira sa mga malls ug pagpatuman sa curfew mao ang tubag sa citywide lockdown or community quarantine.