Balor P30,000 nga livelihood starter kits ang nadawat matag usa sa 30 ka mga ginikanan sa mga child laborers gikan sa walo ka barangay ning dakbayan sa Cagayan de Oro isip kabahin sa programa sa Department of Labor and Employment-Northern Mindanao nga Child Labor Prevention and Elimination Program.
Ang nasangpit nga pag-apud-apud sa livelihood starter kits atol sa flag raising program niadtong Lunes gipasiugdahan sa DOLE-10 ug sa kagamhanang lokal sa Cagayan De Oro pinaagi sa Public Employment Service Office (PESO).
Matud pa ni PESO Manager Kathleen Kate Sorilla ang mga benepisyaryo sa programa naggikan sa Barangay Cugman, Puntod, Gusa, Consolacion, Camaman-an, Macasandig, Tumpagon, ug Besigan.
Tumong sa maong programa nga mahaw-as ang mga kabataan gikan sa mapait nga kasinatian sa pagtrabaho bisan pa man sa kalinghud sa ilang pangidaron.
Dugang pa ni Sorilla ang kalisud ug kapit-os sa kinabuhi maoy nag-unang rason nga mapugos ang mga kabataan sa pagtrabaho sa dili ensaktong panahon.
Nasayran nga una nang nagpahigayon og child labor profiling ang DOLE-10, uban ang PESO-Cagayan de Oro, alang sa 80 ka barangay ning dakbayan.
Gawas sa 30 ka mga ginikanan nga nakadawat sa maong livelihood starter kits, gikatakdang makadawat usab sa susamang kantidad ang laing 100 ka mga ginikanan nga una nang naila sa DOLE-10 karong umaabot nga mga bulan.
(News & photo courtesy of Cagayan de Oro City Information Office Facebook page)