Miabot sa 152 ka mga bata sa barangay Carmen ang mipailawom sa laing hugna nga ‘Klarex nga Serbisyo sa Baryo’ sports clinic bag-ohay lang nga libreng gitanyag sa Cagayan de Oro City Sports Office ubos sa pagpangulo ni OIC Romarey B. Gorro, kauban ang mga banggiitang basketball coaches ug staff.
Kini ang pinakadaghan nga ihap sa mga partisipante sukad nagsugod ang maong programa, diin ang mga libreng basketball uniforms ug mga bola kortesiya sa buhatan ni kanhi Vice Mayor Raineir Joaquin “Kikang” Uy.
Ang coaching staff sa basketball training gipangulohan sa kanhi professional basketball player sa Crispa-Toyota kaniadto ug nakaangkon na sa dili maihap nga mga kampeonato isip coach nga si Hermogenes “Ansing” Anciado.
Ang ‘Klarex nga Serbisyo sa Baryo Sports Clinic’ magpadayon paglibot sa mga kabarangayan aron paghatag og kalingawan sa atong mga kabatan-onan nga mahiligon sa sports.
(News and photo courtesy of CDO Sports Office)