Mangulo si Tokyo Olympic boxing silver medalist Carlo Paalam sa RP national boxing team nga makigsangka sa mga banggiitang boksingero gikan sa lain-laing nasud atol sa Asian Boxing Confederation (ASBC) international boxing tournament nga pagahimoon didto sa nasud sa Kuwait.
Kini ang gibutyag ni Paalam ug Team CDO amateur boxing team head coach Elmer Pamisa atol sa ilang pakighinabi kang Mayor Klarex Uy bag-ohay pa lamang.
Kauban ni Carlo sa RP national boxing team mao ang tulo ka mga boksidor kinsa mga produkto usab sa Cagayan de Oro City Amateur Boxing Team nga gisugdan sa panahon ni kanhi Mayor Oscar Moreno.
Gawas kang Paalam nga modula sa bantamweight division (54 kilograms), ang tulo mao sila si Mark Lester Durenz sa 48 kilograms, Aaron Bado sa 51 kilograms ug John Paul Panuayan sa 63 kilograms.
Ang ASBC boxing tournament magsugod karong Huly 20 hangtud Hulyo 26.
(Source: CIO | Rolando A. UY Facebook page)