Malampusong nabugkos ang kaminyoon sa 63 ka paresan atol sa mass wedding kon ‘Kasalan ng Bayan’ nga gipangulohan ni Mayor Klarex Uy, Agosto 25, diha sa barangay Tignapoloan ning syudad.
Atol sa mass wedding, si Mayor Klarex Uy nagpahinumdom sa matag magtiayon nga sundon ang CHRIST kon ‘Communication, Humility, Respect, Intimacy, Service ug Trust’ isip sentro sa ilang kaminyoon aron kini magmalampuson.
“CHRIST mao na’y simbolo ug bililhon sa usa ka pamilya nga anaa sa panimalay. Mao na siya ang tinubdan sa tanan…sa kalinaw ug kalipay, tanang grasya nga imong pangayoon. Busa ayaw ninyo kalimti siya sa matag adlaw, sa matag hangyo ninyo sa mga kalisdanan ug mga grasya, kamo kanunay modangop kaniya, sa tanan kapakyasan, inyo siya’ng tawagon, sa mga kalampusan, inyo gihapun siya’ng pasalamatan. Ayaw ninyo kalimti ang Ginoo kung gusto mo magmalumpson nga magtiayon,” saysay ni Mayor Klarex Uy.
Gani, dako ang pasalamat sa magtiayon nga sila si Ruel ug Susan Balibagon tungod kay natuman ang ilang pangandoy nga makasal. “Kami nagpasalamat kang Mayor Klarex Uy sa iyang gihatag sa amoa nga ‘Kasalan ng Bayan’. Nalipay gyud mi nga gihatagan mi sa higayon sama niini. Salamat Mayor Klarex Uy.”
Si Ruel ug Susan ang giilang pinakadugay nga nag-uban isip magtiayon, hinungdan nga gihatagan sila ni Mayor Klarex Uy og pahilapay nga balor og P10,000.
Nasayran nga 22 ka tuig na sila nag-ipon, ug adunay tulo ka anak.
Ang matag magtiayon midawat sa libreng lechon, cake ug wine gikan sa Pamilya Uy.
Aduna usab souvenirs nga ilang nadawat sama sa donuts gikan sa Krispy Kreme; mga gamit gikan sa American Surplus, fruit basket gikan ni City Councior Roger Abaday ug uban pa.
Nagsilbing principal sponsors sila si City Councilors Aga Suan; Roger Abaday; Jay Roa-Pascual; Atty. Jose Pepe Abbu Jr.; Yvy Emano; Dra. Malou Gaane; Girlie Balaba; Ian Achas; Ian Mark Nacaya; SK Federation President John Michael L. Seno ug Liga ng mga Barangay president Alam Lim.
Hugot nga suporta usab ang gipakita nila ni City Councilor Suzette Magtajas-Daba, City Councilor George Goking, City Administrator Atty. Roy Hilario P. Raagas, Punong Barangay Nancy Aban sa Barangay Tignapoloan ug uban pa.
Natapos ang kalihokan pinaagi sa paglagda ni Mayor Klarex sa marriage certificates sa mga magtiayon ug paghulagway nga libre sa photobooth nga gipaluyohan usab ni Mayor Klarex Uy.
Ang ‘Kasalan ng Bayan’ gipasiugdahan sa City Civil Registry ubos ni City Civil Registrar Evangeline Tapangan uban sa Philippine Statistics Authority ug opisyales sa barangay Tignapoloan.
Kini parte sa ‘Klarex nga Serbisyo sa Baryo’ outreach program ni Mayor Klarex Uy diin gilusad usab sa susamang adlaw.
(Source: CIO-Cagayan de Oro City)