SULOD sa tulo ka sunod-sunod nga katuigan, nahimong Regional Gold Medal Awardee ang Tuberculosis Program sa Cagayan de Oro City Health Office.
Ang pasidungog gitunol atol sa End TB Race Awards 2022 karong bag-o nga gipasiugdahan sa Department of Health (DOH) subay sa pagsaulog sa World TB Day.
Matud ni Dr. Claire Paglinawan, Medical Officer 1V sa CHO ug kinsa mao usab ang City Tuberculosis Program Medical Coordinator, nga ang maong pasidungog nakuha sa syudad tungod sa paningkamot sa mga personahe nga maabot ang taas nga population testing rate.
Gipasabot ni Dr. Paglinawan nga ang population testing rate nagpasabot nga ang syudad adunay pinakataas nga TB BC treatment enrolment rate ug adunay highest persons treated for sputum positive TB.
Dugang ni Dr. Paglinawan nasakmit usab sa syudad ang bronze award for Bactriologically-confirmed Treatment Enrolment Rate.
Kahinumdoman nga una ang syudad sa Cagayan de Oro nga naglusad sa SunDown Clinic alang niadtong adunay simtomas sa Tuberculosis nga buot magpatambal apan adunay kaulaw ug kaapiki sa panahon nga magpakonsulta.
Ang SunDown clinic sa City Health Office magsugod gikan sa alas 5:00 sa hapon hangtud na sa alas 6:00 sa gabii. (CIO)