Boeing ititigil muna ang paggawa ng 737 MAX

Ititigil muna ang paggawa ng 737 MAX na uri ng eroplano ng Boeing simula sa susunod na taon.

Sinabi ng kumpanya na magsasagawa sila ng evaluation sa kanilang production plans.

Nilinaw naman ng Boeing na hindi ito magreresulta sa mass layoff ng kanilang mga empleyado.

Simula pa noong Marso ay grounded na ang lahat ng uri ng 737 MAX sa buong mundo matapos ang malagim na aksidente sa Indonesia at Ethiopia.

Subalit habang nananatili ang suspensyon ng biyahe ay nagpatuloy ang produksyon ng Boeing sa nasabing uri ng eroplano kung saan 40 kada buwan ang kanilang nagagawa.

Dahil sa dami ng produksyon na hindi naman pa nabebenta bunsod nang umiiral na suspensyon sa biyahe, nagkaproblema na ang Boeing sa storage ng eroplano.