Iriga City – ipinagrekomendar ngunian kan Bureau of Fisheries and Aquatic Resources (BFAR) sa local na gobierno kan Buhi, Camarines Sur na ipasara na nguna an lake Buhi sa mga para-ataman nin tilapia sequiera sa laog nin duwang taon.
Ini an nagin pahayag ni Ms. Noni Enolva, parapahayag kan BFAR matapos na maka-olay kan Radyo Ronda.
Sigun sa saiya, hababa pa an oxygen level kan danao na kaipuhan na gayo kan mga sira tanganing sinda mabuhay, mientras na halangkaw pa an ammonium content na iyo man an magigin kausa kan saindang pagka-gadan.
An nasabing rekomendasyon ipina-abot naman sa local na gobierno sa paagui kan Buhi Lake Development Authority na iyong namamahala sa nasabing danao, para sa saindang konsiderasyon.
Kun mangyayari ini sobra sa 15 mil na mga fishcages an apektado, alagad sa inisyal na informacion higot man ining pinagkontra kan mga para-ataman nin tilapia sa sinambit ng danao.
Kun maipapasara an nasabing danao, kaipuhan man an alternatibong mapagkukuanan nin income O pagbuhay kan mga namamanwaan.
Kun magigirumduman sobra sa 20 tuneladang tilapia an nagadan huli sa fish kill matapos sana an bagyong si quinta. (OIC Melvin Barayoga, RPN DZKI Iriga)
(Source: Interview with Ms. Noni Enolva, BFAR Bicol)