Patay ang usa ka batang babaye human nga mitikyaob ang ilang gisakyan nga motorized pumpboat didto sa kadagatan sa Brgy. Banban, Taganaan, Surigao del Norte niadtong Miyerkules, Setyembre 16 sa may mga alas 6:30 sa buntag.
Sumala pa, sakay ang biktima sa ilang pumpboat nga aduna’y karga nga 12 ka sakong mga buhangin, kauban ang iyang amahan nga mao si Romeo Paguara Hurboda, 54 anyos; ug iyang igsuon nga babaye nga mao si Margie May Moso Hurboda, 25 anyos, dalaga, mga lumulupyo sa Purok 4, Brgy. Upong, Taganaan dihang nalambod sa propeller shaft (ihe) ang iyang buhok. Sa wala pa mahitabo ang disgrasya, gisugo sa iyang amahan nga tangtangon ang tabon sa drain-hose aron malimas ang misulod nga dagat sa luwang sa ilang gisakyan. Didto kalit nalambod ang buhok sa bata sa nagtulijok na ihe. Gumikan sa nahitabo, dali kining gitabang sa iyang amahan apan na-out of balance ang ilang gisakyan ug nakulob ang pumpboat.
Usa ka mananagat ang daling nakarescue kanila ug gidala sila ngadto sa Rural Health Unit diin ang biktima gideklarang dead on arrival sa attending physician.
Ang patay’ng lawas sa biktima ang gihaya sa Arpilleda Funeral Services samtang naghulat sa Post Mortem Examination. (Jun Prex Salubre, Ronda 6 RPN DXKS Surigao)
Â