Nangrugin ti Provincial Education Office nga agawat ti aplikasion dagiti agkalikagum agbalin nga iskolar ti probinsia.
Segun kenni Mrs. Carolyn Juan Agcaoili, Education Research Assistant 1 ti nadakamat a pangopisinaan nga adu dagiti maala a baro nga iskolar iti masungad nga School Year 2022-2023.
Inlawlawagna a daytoy ket gapu iti kalikagum ni Gob. Matthew J. Marcos Manotoc nga ad-adu pay nga agtutubo ditoy probinsia ti matulongan a makaturpos iti panagadalda.
Mainaig iti daytoy, inpalagipna a masapul a dagiti agaplikar iti Academic ken ti Agri/Fishery Scholarship Program ket addaan ti average a grado a 2.5 idinto nga iti Agri/Fishery iti sekondaria ken iti Arts Scholarship Program ket masapul nga addaan ti average a grado nga 80 ken iti Senior High School ket nasken nga addaan ti average a grado nga 85.
Kabayatanna, iyaw-awis ni Dr. Dany Daquioag, Officer In-charge ti Provincial Education Office kadagiti amin nga interesado nga agturong laeng iti opisinada para iti pannakailawlawag a naimbag kadagiti rumbeng nga aramidenda para iti panagbalin nga iskolar ti gobierno probinsial. (Irene Ringor)
(Source: Provincial Government of Ilocos Norte)