Batac: PGIN, ikalkalikagumna nga awan ti tamaud a problema iti pannakaipatungpal ti jeepney modernization

0
1

Maseknan ni Gob. Matthew J. Marcos Manotoc iti pannakaipatungpal ti Jeepney Modernization iti pagilian.

Segun kenni Mr. Perry Martinez, General Manager ti Metro Ilocos Norte Council (MINC) adda ti direktiba ti gobernador iti MINC a masapul nga adda dagiti maipatungpal nga addang tapno masolusionan dagiti problema a mabalin a tumaud iti kanito a mapawilanen dagiti traditional jeepney nga agpasada.

Immun-una ngem iti daytoy, inrakurak ti Department of Transportation nga agingga laengen iti Hunio trenta ti pannakaipalubos kadagiti traditional jeepney nga agpasada ken no mapatgan ti kiddaw a maiyalud-od ti naipaay kadagitoy a pawayway nga agpasada ket mabalin nga agingga iti agtapos daytoy a tawen.

Inbunannag ni Martinez a napinget ti kalikagum ti gobernador a saan a dumanon iti kaawan ti maluganan dagiti kakailian iti kanito a mapawilanen a maminpinsan dagitoy nga agpasada.

Mainaig iti daytoy, impalgakna nga impadanonna kenni Gob. Marcos Manotoc a kasapulan ti dua gasut a modernized jeepney tapno saan nga agkurang ti pagluganan dagiti kakailian ken iti agdama ket limapulo pay laeng dagiti agpaspasada a modernized jeepney ditoy probinsia.

Imbatadna nga adda problema iti iyuutang dagiti kooperatiba iti bangko rason a nagkuyogda iti gobernador a napan nakisarita ken ni DOTR Sec. Jaime Bautista.

Inlawlawagna a karaman kadagiti kiniddaw ni Gob. Marcos Manotoc ti panangnayun ti DOTR iti modernized jeepney nga inpaayda iti probinsia ken ti itutulong ti sekretario tapno makautang dagiti kooperatiba iti bangko.

Malaksid iti daytoy, kunana a napanunotan pay ti gobernador a ti gobierno probinsial ti umutang iti maigatang kadagiti modernized jeepney a maited kadagiti kooperatiba.

Impalgak ni Martinez a ditoy a makipinnirma ti gobierno probinsial kadagiti kooperatiba iti katulagan pakaseknan ti pannakausar dagiti modernized jeepney ken no kasano ti bingay iti mapastrek dagitoy. (Cheena Arzadon)

(Source: Provincial Government of Ilocos Norte)

LEAVE A REPLY

Please enter your comment!
Please enter your name here