Nakasadag iti Philippine Airlines ti pannakaisubli ti “direct flight” manipud idiay Honolulu, Hawaii agingga iti Laoag International Airport.
Segun kenni Mr. Ronald Estavillo, Airport Manager ti LIA, iyur-urayda ti panangisayangkat ti PAL ti inspeksyon iti erupuerto.
Immun-una ngem iti daytoy, kiniddaw ni Gob. Matthew J. Marcos Manotoc iti PAL a maisubli ti “direct flight” manipud Honolulu agingga iti LIA.
Imbatadna a nakasaganan ti erupuerto a pagdissoan ti Air Bus 330 kalpasan dagiti naiyuswat a pannakapasayaat ti erupuerto.
Nupay kasta, agtultuloy latta ti pannakapadur-as ti erupuerto kangrunaanna ti nalawlawa a “turn around pad” a kasapulan dagiti daddadakkel nga eroplano a para iti “international flights”.
Innayonna nga iti agdama ket mannarimaan ti pannakaiproseso ti pannakaipangato iti “level 9” ti LIA. (Cita Macalipis)
(Source: Provincial Government of Ilocos Norte)