Idurduron ni Ilocos Norte (2nd District) Rep. Angelo Marcos Barba ti pannakaibangon dagiti rainwater harvesting facilities kadagiti amin a proyekto ti panagdur-as iti pagilian tapno makatulong a mangtaming iti umad-adani a krisis ti danum.
Ti House Bill (HB) 2412 ket agsapsapul a mangibilin ti pannakaipasdek dagiti pasilidad a pagurnongan ti danum ti tudo kadagiti baro a publiko ken pribado a komersial, institusional, ken residensial a panagdur-as iti intero a pagilian tapno maksayan ti layus ken makatulong a mangkonserba iti mainum a danum.
Kinuna ni Barba a kalpasan ti umuna a pannakaaprobar ti bill bayat ti umuna a deliberasionna ket naintiempuan ti pannakapasa ti House Bill 2412 nangruna ita iti panangrugi ti panawen ti tudo.
Ti naisingasing a bill ket kalikagumanna kadagiti makinkukua wenno developer kadagiti baro a proyekto ti panagdur-as nga agreserba, mangpadur-as, ken mangmantener iti di kumurang a 3 a porsiento iti dagup a kalawa ti proyekto kas pasilidad a pagurnongan iti danum ti tudo.
Iti panangsuportarda iti daytoy nga addang, rinugian dagiti local government units iti Ilocos Norte ti mangbangon iti ad-adu pay a pasilidad a pagurnongan iti danum ti tudo tapno maksayan ti epekto ti panagbalbaliw ti klima.
Adda dagiti nangaramid kadagiti babassit a pagurnongan ti talon nga us-usaren itan dagiti mannalon a mangtaming iti kinakirang ti danum iti nadumaduma a paset ti probinsia, partikular iti panawen ti tikag. (April Joyce Gonzales)
(Source: Congressional office of 2nd district Ilocos Norte)