Inar-arapaap ti agtutubo nga entrepreneur a ni Marvin Xavier Nicolas Vea manipud iti rural farming village ti Bagbago iti Solsona, Ilocos Norte ti kaadda ti tiendaan iti siudad ti Laoag tapno ad-adda a madanon dagiti produktona iti dakdakkel a merkado.
Dina pulos impagarup a nasapsapa nga umay ngem ninamnama ta dagiti pakbet (mixed vegetables) crackers, lettuce chips, ken tilapia gourmet ti Vea Eco Farm, ken dadduma pay, ket maidispley itan iti baro nga inaguraran a one-stop-shop a masarakan iti compound ti Ilocos Norte Agriculture and Fisheries Extension Center Building sadiay Laoag. Daytoy a one-stop shop ket pinunduan ti gobierno probinsial, ket lugar a pagtitiponan para iti panagsanay, panagproseso, ken panaglako kadagiti lokal a produkto. Itampokna pay ti shared service facility para kadagiti organisasion a nakabase iti away, kas iti 4-H Federated Club ken Rural Improvement Club (RIC) ti Ilocos Norte.
Kas aktibo a kasosyo ti gobierno iti panangitandudo ken panangpapartak iti panagdur-as ti away, idauluan ti 4-H Federated Club ken RIC ti operasion ti sentro. “Ditay’ maiyebkas no kasano ti panagyamanmi iti daytoy a proyekto. Ti one-stop-shop ket mangted ti ad-adu a gundaway iti 4-H Federated Club a mangilako kadagiti produktomi,” kinuna ni Vea, a presidente pay ti 4-H Federated Club of Ilocos Norte.
Innayonna nga ad-adda a mangtignay ti tiendaan kadakuada “tapno mapasayaat ti kasayaatan” ken tapno ma-inspire ti ad-adu nga agtutubo a makikadua iti 4-H a mangsuporta iti panagregget ti gobierno a mangitandudo iti inclusive growth.
Nagyaman met ni Ilocos Norte Governor Matthew Joseph Manotoc bayat ti pannakairuar ti one-stop-shop ita a lawas, ta nakunana a kasapulanda ti ad-adu pay nga innovations isu a napateg unay ti partnership da iti 4H.
Malaksid iti pannakipasetda kadagiti inorganisar ti gobierno a trade fairs ken exhibits, imbaga ni Crisner Lagazo, maysa met nga agtutubo a mannalon manipud iti Sulbec, ili ti Pasuquin iti Philippine News Agency a mariknada a nagasat ken naparaburan gapu ta nakasagana ti pannakagun-odda kadagiti nadumaduma a programa ken serbisio ti gobierno.
Tapno masustiner ti inaldaw nga operasion ti sentro, kinuna ni Lagazo nga agsisinnublat dagiti miembro kas “duty for the day.” (April Joyce Gonzales)
(Source: Provincial Government of Ilocos Norte)