Nakadakdakkel a tulong para kadagiti mangrugrugi ti negosiona dagiti programa nga isaysayangkat ti gobierno nangnangruna iti gobierno probinsial iti panangidaulo ni Gob. Matthew Marcos Manotoc kas iti naisayangkat a seminar ita nga aldaw iti auditorium ti kapitolio probinsial.
Daytoy ti inbunannag ni Mr. Richard Lamug, mangiwanwanwan iti Mushroom King Food Products ti ili a Bacarra.
Inlawlawagna a kangrunaan a dakkel a nakatulong kenkuana nangnangruna iti panawen ti pandemia kas iti Sunday Market.
Imbatadna a maitantandudu dagiti produktona kadagiti programa ti gobierno probinsial ken mailaklako daytoy kadagiti “pasalubong center” ti probinsia.
Kabayatanna, namnamaenna a ti dimmalananda ita nga aldaw a “seminar on food safety with emphasis to good manufacturing practices” ti ad-adda pay a makatulong iti negosiona nangnangruna ket mannarimaan ti panangur-urnosna iti sistema ti “farm” na tapno makagun-udda ti dadduma pay a certificate kangrunaanna ti manipud iti Food and Drug Administration wenno FDA.
Innayonna a sigurado nga ad-adda pay a sumayaat ti negosioda nangnangruna iti pannakaiproseso dagiti produktoda iti babaen ti dimmalananna a seminar.
Mainaig iti daytoy, impadanonna ti napalaus a panagyamanna ken ni Gob. Marcos Manotoc iti adun a suporta nga inpaayna iti negosiona ken kadagiti dadduma pay a babassit a negosiante. (Ronald Domingo)
(Source: Provincial Government of Ilocos Norte)