Maysa a napudno a tricycle driver iti siudad ti Laoag ti nangisubli iti pouch bag a naglaon iti PHP170,000 iti akinkukua daytoy a napukawna iti igid ti kangrunaan a kalsada ti sentro ti Laoag.
Kinuna ni Willie Pascual, agtawen 49, residente iti Barangay 59-A Dibua South, Laoag City, a saan a pulos a simrek iti panunotna nga alaenna ti kuarta para iti bagina.
Kinuna ni Pascual nga agar-aramid daytoy iti panagrikus a mangsapsapul kadagiti pasahero idi nadlawna ti maysa a pitaka iti kalsada, a nangtignay kenkuana a nangpidut ken nangikabil iti isu met laeng iti money box ti sidecar-na.
Ngem idi makitana ti adda iti uneg ti pouch bag a naglaon iti dua a bunton ti 1,000-peso a papel de banko nga awan ti pakabigbiganna, nagnerbios ket inkeddengna nga ipakaammo iti presidente ti tricycle driver association-na iti passenger terminal.
Gapu ta awan ti pakabigbigan iti uneg ti pouch bag, kinuna ni Pascual nga inreportna ti insidente iti maysa a personnel ti radio station.
Ti instinct-na, kinuna ni Pascual, ti nangibaga kenkuana a kasapulan ti makinkukua ti kuarta ken ti panangisubli iti dayta ti umiso nga aramidenna.
Naammuan a ti kuarta ket in-claim ti makinkukua kalpasan a maitutop nga inladawan ti naud-udi ti linaon ti pouch bag.
Bayat ti pannakapasamak daytoy, adu nga umili ditoy ti nangdayaw iti kinamapagpiaran ni Pascual iti baet ti narigat a kasasaad itatta ket inaramidna ti umno a banag a nangisubli iti bag iti akinkukua. (April Joyce Gonzales)
(Source: LGU Laoag City)