Pinunduan ti Department of Health iti PHP48.5 million, ti MRI ket nairanta a mangipaay kadagiti diagnostic procedures kadagiti biktima ti stroke ken dadduma pay.
Iti ababa a panagbitlana kabayatan ti inagurasion iti provincial hospital idi Mierkoles, kinuna ni Governor Matthew Joseph Manotoc a daytoy ti umuna a gundaway a maaw-awat ti provincial hospital ti kastoy a klase ti medical equipment.
Kanayonanna, lima a fully-equipped ambulance, manipud met iti DOH, ti na-turnover iti isu met laeng nga aldaw.
Dagitoy a lugan ket paset dagiti pito nga ambulansia nga inkari ti DOH iti probinsia. Maited dagitoy kadagiti district hospitals iti ili ti Sarrat, Piddig, Vintar, Bangui ken iti provincial hospital tapno maibiahe dagiti pasiente, partikular dagiti agnanaed iti adayo a lugar.
Dua pay nga ambulansia ti manamnama a maidanon iti mabiit iti maikadua a distrito ti probinsia. Kinuna ni Manotoc, adu ti inaramidda a panagrang-ay iti ospital ngem maysa pay laeng a work in progress.
Immuna a nagkiddaw ni Ilocos Norte First District Representative Ferdinand Alexander Marcos iti dose nga ambulansia manipud iti DOH ngem lima laeng ti naitulod agingga ita.
Kalpasan ti panagpirma ti memorandum of agreement iti gobierno ti Ilocos Norte, nagapela ni DOH regional director Paula Paz Sydiongco kadagiti umawat nga LGUs nga asikasuenda a naimbag dagiti medical equipment.
Kas paset dagiti kasapulan iti lisensia para iti ambulansia, mayakar ti panagtagikua iti nagan ti umawat iti uneg ti innem a bulan.
Kabayatanna, inkari pay ti gobernador nga ipangatona ti sueldo dagiti healthcare professionals ditoy probinsia. Innayun pay ni manotoc, a siguraduenda a maragsakan dagiti umili ta panggepda ti mangtangdan iti ad-adu pay a medical professionals ditoy probinsia. (April Gonzales)
(Source: Provincial Government of Ilocos Norte – Communications & Media Office)