Ad-adu pay nga agas ti uyek ken panateng, bitamina, salbutamol inhalers, ken dadduma pay nga agas, ti maiwaras kadagiti lugar a nadangran ti bagyo iti Ilocos Region.
Kas sungbat iti awag ni Senador Imee R. Marcos, kinuna ni Regional Director Paula Paz Sydiongco iti Department of Health-Ilocos Region nga agtultuloy ti panangipaayda iti libre a medical consultations ken assorted drugs, agas ken first aid kits manipud iti DOH Central Office kadagiti pamilia a naapektaran ti bagyo.
Innayonna a naitulod met dagiti kanayonan a hygiene kits, jerry cans ken bottled water kadagiti hard-hit communities.
Naidestino met dagiti health personnel manipud iti DOH-Ilocos Region ken medical doctors, nurses ken engineers manipud iti Ilocos Training and Regional Medical Center tapno masigurado a saan a rumsua dagiti sakit a maigapu iti taraon ken danum kalpasan ti bagyo.
Nabingay ti grupo iti uppat a cluster, a mangipapaay iti medikal ken salun-at ti publiko a sanitasion ti danum ken kinadalus, nutrision, salun-at ti isip ken siko-sosyal a suporta. (April Joyce Gonzales)
(Source: DOH)