Nakastrek ti innem nga ababa a pelikula a “finalist” iti Tan-ok ni Ilocano Film Festival ita a tawen 2023.
Segun ken ni Provincial Tourism Officer Mr. Aianree Raquel dagitoy dagiti pelikula a Karkarma, Kasano Kadi ti Agwaywaya?, Aweng, Dagiti baro a banuar, Dayo ken Tabon.
Imbatadna a daytoyen ti maikatlo a tawen a pannakaisayangkat ti nasao nga aktibidad ken maikaduan a gundaway a maipabuya dagiti finalist a pelikula iti pagsinean kangrunaanna iti Robinsons Movie World.
Mainaig iti daytoy, impadanonna ti napalaus a panagyamanna iti suporta nga ipapaay ni Gob. Matthew Marcos Manotoc ken ti sibubukel a gobierno probinsial pakairamanan ti mangiwanwanwan iti nadakamat a pagsinean.
Inlawlawag ni Raquel a napipintas ken de kalidad dagiti ar-aramiden a pelikula dagiti ubbing wenno agtutubo a producer nga Ilocano.
Mamati nga iti tulong ti gobernador ken ti sibubukel a gobierno probinsial ket ad-adda pay a maasa ti kinalaing dagitoy nga agaramid ti pelikula.
Ginutigot ti provincial tourism officer dagiti ubbing a producers wenno agar-aramid ti pelikula ditoy probinsia a mangitultuloy nga agaramid kdagiti napapateg nga Ilocano materials para iti agdama ken iti sumarsaruno a henerasyon.
Mangnamnama ni Raquel a maipalawa wenno manayunan pay dagiti kategoria dagiti maaramid a pelikula kadagiti sumarsaruno a tawen kas kadagiti at-atiddog a pelikula. (Ronald Domingo)
(Source: Provincial Government of Ilocos Norte)