Makipartisipar ti Ilocos Norte iti kaunaan a gundaway sipud rimsua ti pandemia iti kadakkelan ken kapautanen a travel trade show iti pagilian ti Philippine Travel Mart a maisayangkat manipud Septiembre trenta agingga iti Oktubre dos idiay SMX Convention Center, Mall of Asia.
Segun kenni Mr. Xavier Ruiz ti Provincial Tourism Office, nagbunga ti pannakipartisipar ti probinsia iti nasao a “Marketing Event” kadagiti kallabes a tawen sakbay ti pandemia a nangitunda iti iyaadu dagiti turista a bimmisita ditoy probinsia ken nagresulta iti ad-adu a negosio para kadagiti “Tourism Stakeholder”.
Mainaig iti daytoy, namnamaenna a magun-od manen daytoy ti probinsia bayat ti agtultuloy a panagrekobrena iti tulong dagiti makipartisipar a Travel Agents ken hotel ditoy probinsia.
Inbunannag na a mangidiaya dagitoy ti “special packages” a mangitampok kadagiti baro a buya wenno napipintas a lugar ken aktibidad a maipagpannakkel kadagiti turista.
Immun-una ngem iti daytoy, inpakaammo ni Gob. Matthew J. Marcos Manotoc a maysa ti “booth” ti Ilocos Norte kadagiti kangrunaan a maitampok iti nasao nga aktibidad.
Namnamaenna a dakkel ti maitulong daytoy iti ad-adda pay a pannakaipadur-as iti turismo ti Ilocos Norte.
Inlawlawag ni Ruiz a ti inspirasion ti naaramid a booth ket ti Kapurpurawan Rock Formation ken ti Burgos Wind Mill.
Agserbi nga Ambassador ti Philippine Travel Mart ita a tawen da Miss Earth 2014 Jamie Herrell ken ti nalatak a vlogger a ni Miss Michelle Dy.
Author: Irene Ringor, PGIN-CMO
Source: PGIN-CMO