Batac: Ferdinand Alexander “Sandro” Marcos, binallaagan na dagiti opisial ti purok ditoy probinsia

0
2

Binallaagan ni Senior Deputy Majority Leader ken Ilocos Norte First District Representative Ferdinand Alexander “Sandro” Marcos dagiti opisial ti purok ditoy probinsia a saanda a kolektaen ti aniaman a bayad manipud iti pannakaipaulog ti certificate of indigency.

Inruar ti anak ti presidente ti nasao a pakdaar kalpasan ti report iti distritona maipapan iti sumagmamano a hepe ti purok iti Siudad ti Laoag a maipagarup a mangilaklako iti indigency certificates kadagiti konstituenteda.

Idi napan a Marso, ti opisina ni Marcos, iti pannakitinnulong ti Department of Social Welfare and Development (DSWD), ket nangiruar iti programa ti subsidy iti taraon a mangted karbengan iti maysa nga indigent recipient nga umawat iti di kumurang a PHP3,000.

Malaksid daytoy iti nadumaduma a programa ti tulong nga ipatpatungpal ti mammanday-linteg a pakairamanan ti educational, medical, cash, transportation assistance, ken burial assistance, ken dadduma pay.

Gapu iti napalaus a bilang dagiti lokal nga agtarigagay nga ag-avail iti nadumaduma a tulong iti distritona, inkarina ni Marcos a ti sumaruno a payout distribution, partikular kadagiti urban areas kas iti Laoag City, ket maaramid iti cluster tapno maliklikan ti atiddog a linya ken dakkel a bunggoy.

Plano met ni Marcos ti agkiddaw iti kanayonan a workforce wenno plantilla positions iti DSWD tapno mapapartak ti proseso ti pannakairuar ti tulong kadagiti saan unay a nabaknang.

Immuna nga inwaragawag ti opisina ni Marcos a 500 laeng ti matulonganda a benepisiario para iti educational assistance ken 500 a benepisiario para iti food assistance iti kada aldaw. (April Joyce Gonzales)

(Source: Provincial Government of Ilocos Norte)

Leave a Reply