Inturong ti Department of Science and Technology (DOST) idi Biernes iti di kumurang a maysa a tonelada a produkto ti Vigormin iti gobierno probinsial ti Ilocos Norte tapno mapabassit ti coliform level iti Paoay Lake water park.
Kinuna ni DOST Ilocos Norte Provincial Director Benjamin Mercado Jr. iti interview idi Biernes a ti Vigormin powder ket nababa ti gastosna a solusion tapno mapabassit ti coliform level gapu iti narugit a danum, drainage systems, ken nabati a solid waste a maurnong iti paoay lake bayat ti panagayus iti rabaw ti daga.
Kas paset ti preventive measures, kinuna ni Mercado a dagitoy ket ibinglay ti di kumurang a lima nga establisimiento iti aglawlaw ti paoay lake nga isuda: Malacañang ti Amianan, Kamarin Cafe, Jowtoo, Bellagio Hills ken ti Paoay Lake water park.
Bayat nga ipakpakita ti DOST no kasano nga usaren ti pulbos ti Vigormin a nalaokan iti danum ken kalpasanna mai-flush kadagiti kasilyas, inrekomendar ti DOST ti panangusar iti produkto para iti siam a lawas a nakaro a panangagas.
Immanamong met ti gobierno ti Ilocos Norte, iti pannakitinnulong dagiti bumarangay iti aglawlaw ti paoay lake a maaramid ti binulan a panagdalus para iti prevention control.
Babaen ti science and technology interventions, namnamaen ti gobierno ti Ilocos Norte nga ad-adda a sumayaat ti kalidad ti danum iti paoay lake.
Kalpasan a naikkat dagiti restriksion ti pandemia, dakkel ti akem ti Paoay Lake waterpark iti pannakapabiag manen ti industria ti turismo iti probinsia, a naipasdek manen ti reputasion ti Ilocos Norte kas maysa kadagiti matarigagayan unay a “new normal” a destinasion. (April Joyce Gonzales)
(Source: DOST Ilocos Norte)