Inkari ti Philippine Ports Authority – Port Management Office (PPA-PMO) sadiay Northern Luzon nga agtultuloy a pasayaaten ken moderno dagiti pasilidad ken serbisio ti seaport babaen ti tulong ti Department of Tourism (DOT), tapno maailukoy ti ad-adu pay a cruise liners ken investors a bisitaen ti Rehion.
Inted ni Northern Luzon Port Manager Marieta Odicta ti pammatalged kalpasan ti June 26 maiden call ti M/S Heritage Adventurer iti Currimao Seaport, a madama ita a mapalawa tapno makaakomodar kadagiti dadakkel a cruise vessels.
Kinuna ni Odicta, ta sapay koma ta daytoy ti pangrugian ti ad-adu pay a cruise vessels ken dadduma pay a kita ti barko a sumangpet iti sangladan.
Kabayatanna, agtultuloy dagiti aktibidad ti panagbangon ken panagbarado tapno mamoderno ti sangladan ti baybay ti Currimao ken mapalubosan ti pannakaisanglad dagiti dadakkel a barko.
Iti daytoy pannakairugi manen ti cruise calls iti nasao a sangladan, kinuna ti gobierno ti liocos Norte a namnamaenna a maallukoy ti ad-adu pay a turista ken investors ken agbalin ti llocos Norte a top choice kadagiti cruise liners.(April Joyce Gonzales)
(Source: Provincial Govenment of Ilocos Norte)
