General Santos City – Pormal nga gipahigayon ang turnover ceremony sa bag-ong City Health Office (CHO) building, nga nailhang Health Emergency Response Operations (HERO) Center, nga nagtumong sa pagpalambo sa serbisyo sa panglawas sa mga residente sa General Santos City.
Sila si Mayor Lorelie Geronimo Pacquiao ug DPWH District Engineer Jonathan Bantug maoy nangulo sa makasaysayanong kalihokan, nga gisaksihan ni Acting City Health Officer, Dr. Lalaine Calonzo, PDOHO Sarangani ug General Santos City, Dr. Shahrir Duldoco, Chief of Hospital, Dr. Ryan Aplicador, Congressman Ton Acharon nga girepresentahan ni Hon. Aying Acharon, LnB President/Councilor Bobby Pacquiao, Councilor Odjok Acharon, ug Councilor Beth Bagonoc.
Sa iyang mensahe, gipadayag ni Dr. Calonzo ngadto kang Mayor Pacquiao ug Sen. Koko Pimentel sa ilang walay puas nga suporta sa pagpatuman sa P50 milyones nga proyekto.
Matod ni Mayor Pacquiao, ang HERO Center usa ka importanteng lakang aron mapadali ang serbisyo sa panglawas ug matubag ang mga panginahanglanon sa mga Heneral, ilabi na sa panahon sa emerhensya.
Dugang pa, uban ni Konsehal Bobby Pacquiao, mohatag siya og napulo (10) ka lamesa alang sa edipisyo, samtang ang Punong Barangay Aying Acharon mohatag usab og napulo isip suporta.
Gimando usab ni Mayor Pacquiao nga pauswagon pa ang palibot sa pasilidad pinaagi sa flooring ug landscaping aron mahimong mas nindot ang lugar.
Ang HERO Center maoy simbolo sa progresibong liderato ni Mayor Lorelie Geronimo Pacquiao, kinsa padayong nag-una sa panglawas sa mga molupyo sa dakbayan. (Rem Agdon)
News&Photos: CMO