Gitunol karong buntag ang 28-classroom, 4-storey building with ramp sa Brgy Puntod human sa taas nga panahon sa paningkamot sa administrasyon ni Mayor Oscar Moreno nga mabuhatan og bag-ong school building ang maong barangay.
Matud ni City Engr. Rolando Pacuribot Jr. nga mokabat sa P40 milyones ang pundo nga gigahin sa syudad alang sa maong proyekto ug kini aprobado sa mga sakop sa Local School Board (LSB).
Gipasabot ni Engr. Pacuribot nga bisan pa man sa nagpadayong pandemic nga nasinati sa tibuok kalibutan, wala gibiyaan ni Mayor Moreno ang proyekto alang sa edukasyon pinaagi sa pagtukod og dugang pang mga tunghaan.
Ang maong gambalay natibawas pinaagi sa kooperasyon ni Punong Barangay Rexie Tinampay ug mga barangay officials sa Puntod.
Lakip sa misaksi sa turnover sila si Konsehal Edna Dahino, Edgar Cabanlas, Suzette Magtajas-Daba, Maria Lourdes Gaane, Yan Lam Lim, Jay Roa Pascual; mga sakop sa LSB kauban si LSB Executive Director Maria Dulce Potenciano, Schools Division Superintendent Cherry Mae Limbaco, kauban ang mga kadagkoan sa DepEd ug City Hall officials.
(Source: City Information Office, photo courtesy by Jomar Figuracion)
