Nagmalampuson ang pagpahigayon sa “Adopt-A-Station” alang sa pagpanindot sa 3003 Steps Linabo Peak kaniadtong nakalabayng adlaw ning tuiga didto sa 3003 Steps sa Linabo Peak, Brgy. Lugdungan, ning dakbayan nga nagsugod sa may alas-3:00 ang takna sa hapon. Ang maong kalihokan ang gipangunahan sa buhatan sa City Environment and Natural Resources ilawom sa pagdumala ni City ENRO, Ms. Mercedita C. Guerrero.
Tumong sa maong kalihokan ang paglusad sa pagpananum og mga pangadlaw kon orchids didto sa matag estasyon sa Linabo Peak isip pagpanindot ug pagpalambo sa kinaiyahan didto sa nasangpit nga lugar. Nasayran nga angkonon sa nagkalaing-laing ahensya sa gobyerno lakip na ang mga nagkadaiyang organisasyon dinhi sa dakbayan ang responsibilidad sa pagpananum og pag-monitor sa mga “orchids” nga ilang gipangtanom sa matag estasyon sa Linabo Peak.
Ang maong kalihokan ang gitambongan ni City Mayor Darel Dexter T. Uy, kinsa mipabati sa iyang mahinungdanong mensahe kabahin sa pagpakabana sa kinaiyahan ug nangunahan sa paglitok sa “Pledge of Commitment” ngadto sa mga misalmot niini, uban ni Lugdungan Punong Barangay, Hon. Paterno Laclac Jr. nga mipabati usab sa iyang mensahe isip pagbukas sa maong kalihokan kalihokan.
Lakip usab sa mitambong sila si City ENRO, Ms. Mercedita C. Guerrero, kinsa mihatag og “briefing” sa nasangpit nga kalihokan, City Agriculturist, Engr. Kerr N. Porlas, PNP-PPO PLtCol. Jaime N. Barredo Jr. ug Dipolog City Eco Club Adviser, Mahal B. Rosel, kinsa nga mipabati usab sa mensahe nila atol sa maong kalihokan, Sangguniang Kabataan (SK) Federation President, Hon. Mandel Zoe Lugasan, mga opisyales gikan sa Brgy. Lugdungan, mga representates gikan sa Bureau of Fire Protection (BFP), Bureau of Jail Management and Penology (BJMP), PNP Dipolog, Sangguniang Kabataan (SK), ZNFEPA, Patawid Pamilyang Pilipino Program (4Ps) ug City Tourism Officer, Ms. Cecil R. Bilog, kinsa mipabati usab sa iyang mensahe isip pagtak-op sa maong kalihokan.
Human sa paglitok sa “Pledge of Commitment” sa mga partisipantes, diha-diha dayon nananum sila og mga “orchids” didto sa Parking Area sa Linabo Peak alang sa “Ceremonial Planting” niiini. Natapos ang maong kalihokan pinaagi sa pagkuha’g mga hulagway sa mga misalmot sa maong kalihokan.
(City Information Office-jnp)