Zamboanga de Sur – Malampusong napahigayon ang Project Briefing and Package of Technology Seminar sa Zamboanga del Sur Plant Now Pay Later on Hybrid Yellow Corn Production adlawng Huwebes, Abril 15, 2021 sa Maguindanao Hall ug Megayon Stage, Dao, Pagadian City.
Ang maong seminar ang gilangkuban sa 580 farmers diin 300 niini ang naggikan sa ikaduhang distrito ug 280 ang gikan sa unang distrito. Tumong sa maong seminar mao ang paghatag ug mga giya sa mga mag-uuma kung unsaon nila pagpalambo ang ilang mga abot. Human sa maong seminar madawat sa maong mga mag-uuma ang binhi, herbicide ug abuno nga nagkantidad ug ₱ 18, 870.00.
Personal nga gitambungan sa amahan sa lalawigan Gov. Victor J. Yu ug Deputy Speaker Congresswoman Divina Grace Yu kauban ang mga board members ang maong kalihukan.
Gidasig sa amahan sa lalawigan ang mga mag-uuma nga magkugi aron nga mulambo sila sa ilang panginabuhian. Dugang pa niya nga sa administrasyon karon naglantaw sa importansya sa mga katawhan.
Gisaad usab ni Deputy Speaker Divina Grace Yu nga kutob nga anaa pa sila sa gobyerno paningkamotan nila nga makahatag ug programa nga para sa kaayohan sa mga mag uumang Zambosurians. Panghinaot pa niya nga pinaagi sa pagtinabangay ug programa sa provincial government madasig ang mga mag uuma nga magkugi aron nga makab-ot ang tinuod nga kalambuan.
Gibutyag usab niya nga adunay programa ang Department of Agrarian Reform (DAR)alang sa mga agriculture students diin pagahatagan sila ug isa ka ektaryang yuta kung mu-graduate na sila.
Muasenso ang panginabuhian sa mga katawhang Zambosurian maoy pangandoy sa kasamtangang administrasyon tungod kay usa sa mga plano ni Gov. Yu mao ang kaayohan sa mga katawhan sa lalawigan.
(Source and photo courtesy of Victory Zamboanga del Sur)