Gipang-apod-apod ngadto sa 40 ka mga magtutungha sa high school gikan sa nagkalainlaing pampublikong tulonghaan dinhi sa dakbayan sa Dipolog ang E-Learning gadgets kaganinang buntag, Mayo 5 ning tuiga didto sa Plaza Magsaysay ning dakbayan.
Ang nasangpit nga mga gadgets nagagikan sa organisasyong PDP Cares uban usab sa pagtambayayong sa kagamhanang lokal sa Dipolog.
Si Mayor Uy, atol sa gipahigayong hamubong programa, ang nagpasalamat sa Labaw’ng Makagagahum nga dunay daghang grasyang nadawat ang Dipolog sama ning nasangpit nga mga gadgets alang na sa edukasyon sa kabataan. Lakip niyang gipasalamatan ang PDP Cares ilawom sa liderato ni Senator Koko Pimentel tungod kay ning panahon sa pandemya, importante kaayo ang e-learning gadgets alang sa pagtuon sa kabataan.
Gitambagan usab niini ang mga magtutungha nga ampingan ug dili gamiton sa dula o Facebook ang maong tablet tungod kay kini gihatag alang man sa ilang edukasyon.
Nasayran nga ang Human Resource Management and Development Office (HRMDO) maoy mohashas sa mga aplikante diin ang target beneficiaries mao ang mga anak sa job order workers sa dakbayan, anak sa Barangay Health Workers (BHW) ug Barangay Nutrition Scholars (BNS) nga nakapa-enroll ning tuiga.
Nitambong usab sa maong kalihukan si Dipolog City Schools Division Superintendent Dr. Virgilio P. Batan, Jr., Vice-mayor Horacio Velasco ug City Councilors Marilou Calibo ug Mandel Zoe Lugasan.
(City Information Office-Ltd)