General Santos City – Gipangunahan ni General Santos City Mayor Lorelie Pacquiao kauban si Sarangani Governor Rogelio “Ruel” Pacquiao ang pagbukas sa 3rd Mindanao Shrimp Summit nga gipahigayon sa GreenLeaf Hotel ning s’yudad sa General Santos.
Mokabat sa 600 ka mga delegado ug stakeholders ang nagtapok aron hisgotan ang lain-laing mga isyu ug kabalaka, ingon man ang mga estratehiya nga makatabang sa pagpadayon sa kalamboan sa industriya sa hipon sa rehiyon.
Sumala sa mga rekord sa industriya, ang probinsya sa Sarangani sa pagkakaron nag-host sa mga 800 ka ektarya sa mga shrimp farms samtang ang GenSan adunay mga 50 ka ektarya.
Niini nga katigoman, gihataga’g gibug-aton ni Mayor Pacquiao ang importansya sa industriya sa pasayan sa pagpalambo sa panginabuhian ug pagsiguro sa food security sa General Santos ug sa tibuok Mindanao.
Sa iyang mensahe, gidayeg ni Mayor Pacquiao ang SARGEN Shrimp Stakeholders’ Association, Inc. (SSSAI) ug uban pang stakeholders sa ilang pagpaningkamot sa pagpatubo sa hipon nga industriya sa pagpanguma.
Matod niya, ang lokal nga kagamhanan magpadayon sa pagpasiugda og mga programa nga mosuporta sa mga mag-uuma sa hipon, ilabi na sa paggamit sa modernong teknolohiya ug malungtarong gawi.
Si Mayor Pacquiao nakadawat ug Plaque of Appreciation ug token gikan sa staff sa SARGEN Shrimp Stakeholders’ Association, Inc. (Rem Agdon)