GILUSAD bag-ohay lang dinhi sa Cagayan de Oro ang 3Rs pilot projects sa UN Habitat pinaagi sa Healthy Oceans Clean Cities Initiative (HOCCI) ug City Local Environment and Natural Resources (Clenro) sa tinguha nga mas mapakunhod pa ang basura dinhi ning syudad.
Ang Cagayan de Oro usa sa mga napiling pilot area sa UN Habitat diin benepisyaryo niini ang MRF Cooperative nga mga kanhi scavengers kon mangaykayay sa gisiradong ‘open dumpsite’ sa Upper Dagong sa Brgy Carmen.
Atol sa paglusad gipasabot ni Clenro Asst Department Manager EnP Elvisa Mabelin giunsa pagpalambo ug palig-on sa mga sakop sa MRF Coop pinaagi sa pag-abag sa Clenro ug UN Habitat-HOCCI ingon man uban pang stakeholders aron mapalapdan pa ang ilang livelihood program ingon man pag-renobar sa central material recovery facility ug paghatag og closed-process plastic densifier machine.
Nasayran nga ang Cagayan de Oro maoy pinakaunang syudad sa nasud ug usa sa pipila lamang ka syudad sa ASEAN Region nga nakamugna og City Plan of Action on Marine Litter (CPOA-ML) agig suporta sa pag-localize sa Philippines National Plan of Action on Marine Litter.
Gani man, ang syudad lamang sa tibuok nasud sa kalibutan ang nakahimo sa ‘Global Waste Wise Cities and Waste Flow Diagram tools with remote support’ niadtong 2021. Ang launching activity gisalmotan sa mga opisyales sa Barangays 1-40 ning syudad.
News and photo courtesy of CIO CDO