Malampusong gipahigayon ang 2nd Semester meeting sa Dipolog City Cooperative Development Council nga didto gipahigayon sa 7 Treasures Restaurant, Top Plaza Hotel ning dakbayan sa Dipolog, Septiyembre 10 ning tuiga, nga nagsugod sa may alas 10:00 ang takna sa buntag.
Si konsehal Marilou Y. Calibo kinsa maoy nagrepresentar ni Mayor Darel Dexter T. Uy ang midasig sa mga miyembro sa nagkalain-laing kooperatiba nga ipatigbabaw ang “spirit of cooperativism” dinha sa ilang tagsa-tagsa ka grupo. Dugang niya nga aron magpabilin ang kultura nga “bayanihan”, importante ang tulo ka aspeto nga maoy mo-umol sa matag usa ug kini mao ang “love, care ug share”.
Samtang mipadayag usab sa iyang mensahe, pinaagi sa sulat, ang bag-ong milingkod nga Regional Director (RD) sa Cooperative Development Authority (CDA) sa Rehiyon 9 nga si RD Glenn S. Garcia. Sumala niini, nalipay siya sa bag-ong kalamboan sa Akta Republika 11364 nga mi-ila sa Cooperative Development Council ug sa RA 11535 nga gihimong mandatory ang pag-establisar og lokal nga buhatan sa mga kooperatiba, ingon man ang pagtudlo o pag-appoint sa mga cooperative development officers.
“I assure you, as the Director of CDA R9, my priority is to strengthen and capacitate more the local cooperative development offices as well as the local development councils as a basic mechanism to advocate for more and better policies conducive for cooperative development”, tipik sa mensahe sa Regional Director.
Nasayran nga dinhi sa dakbayan sa Dipolog, adunay 37 ka mga aktibong kooperatiba nga miyembro ning nahisgutan nga konseho.
(Source: DIPOLOG CITY GOVERNMENT Facebook page)