Iriga City — Pinaboran kan Bicol IATF an nagin kahagadan ni Gov. Migz Villafuerte kan Camarines Sur na maibugtak sa panibagong quarantine classification an 29ng mga banwaan asin cuidad nin Iriga paghali sa MGCQ- Modified General Community Qurantine pasiring sa General Community Quarantine- GCQ an dagos ng pinaboran, matapos an saindang deliberasyon kan nagtalikod na Lunes petsa 13 kan bulan na presenti.
Ini an nakapalaman sa resolution no. 2021-015 na pirmado ninda DILG Regl Dir. Atty. Anthony Nuyda asin DOH Regl Dir. Dr. Ernie Vera, Chairman asin Vice Chairman kan Bicol IATF matapos na maresibe an kahagadan ni Villafuerte.
Inako kan mga opisyal na talagang, naglalangkaw an kaso kan covid-19 sa mga banwaan kan Canaman, Lagonoy, San Jose, Bombon, Calabanga, Lupi, Goa, Libmanan, Pasacao, Pili, Ocampo, Camaligan, Milaor, Minalabac, Pamplona, Tigaon, Caramoan, Magarao, Presentacion, Ragay, Tinambac asin mga Banwaan sa Rinconada arog kan Baao, Nabua, Buhi, Bato, Bula, Balatan asin cuidad nin Iriga na inot naman na deklaradong yaon sa high asin minimum risk areas huli sa pandemya.
Katakod kaini, may mga rekomendasyon man na ilinatag an Bicol IATF sa mga lugar na ibubugtak sa GCQ kaiba na an padagos na pagsunod sa minimum health protocols, pagpapakusog kan contact tracing, isolation asin treatment tanganing mapahuros an numero kan mga tinatamaan kan virus.
Ma-epekto an GCQ sa nasabing mga lugar sa laog nin 15 dias poon kasu-odma petsa 16.