Davao City – Mokabat sa 16% sa mga tunghaan sa Davao City ang misalmot sa School-Based Immunization Program gikan Oktubre 7-11, 2024.
Matod ni Davao City School Division Superintendent Dr Reynante Solitario, ang nasangpit nga aktibidad magpadayon hangtod sa Disyembre karong tuiga aron mabakunahan ang tanang mga batan-on sa Grade 1 ug 7 batok sa Measles Rubella ug Tetanus Diptheria samtang batok sa Human Papilloma Virus alang sa Grades 4 nga mga babaye nga tinun-an.
Base sa talaan sa Department of Education Davao City School Division, sa unang semana sa implementasyon, 71 ka eskwelahan o 16% sa kinatibuk-ang publikong eskwelahan sa Davao City ang gibisita alang sa SBIP.
Gikan sa target nga 30,684 ka grade 1 pupils, 2,422 ang nabakunahan batok sa Measles Rubella ug 2,415 batok sa Tetanus Diptheria.
Samtang 1,368 ka mga tinun-an sa grade 7 gikan sa target nga 29,722 ka mga tinun-an ang nabakunahan batok sa Measles Rubella ug 1,231 batok sa Tetanus Diptheria.
Sa laing bahin, gikan sa 15,342 ka grade 4 female pupils, 1,054 ka mga estudyante ang nabakunahan batok sa Human Papilloma Virus.
Gipasalig sa DepEd Davao nga magpadayon ang ilang suporta ngadto sa Department of Health ug City Health Office aron matubag ang panginahanglan sa mga batan-on alang sa ilang panglawas. (Camille Santos Naraga)
(Source: Contributed)