Davao City – Malampuson ang tulo ka adlaw nga Peace Building Seminar sa 89th Infantry Battalion Philippine Army sa Sityo Panaga, Barangay Colosas, Paquibato District ning syudad sa Davao. Ang nahisgutang aktibidad gitambungan sa 120 ka mga Underground Mass Organization kun UGMO nga mga kanhi sakop ni anhing Leoncio Pitao alyas Kumander Paragu sa Pulang Bagani Command 1.
Sumala pa ni Lieutenant Colonel Silas Trasmontero, commander sa 89th IB nga ang pag alsa sa mga kanhi supporter sa rebeldeng komunistang New Peoples Army ang nagpakita sa pagkab ot sa hingpit nga kalinaw sa Barangay Colosas.
Gipasabot pa ni LtCol. Silas Trasmontero nga ang Peace Building Seminar pinasubay kini sa kamanduan ni Presidente Rodrigo Duterte pinaagi sa Executive Order number 70 kun ang Whole of the Nation Approach.
Sulod sa tulo ka adlaw, gibisita kini sa nagkalain laing ahensiya sa nasyunal nga kagamhanan aron ipasabot ug ipahibalo ang mga programa’g proyekto sa komunidad nga giilang conflict affected area sama sa Barangay Colosas.
Samtang si Civil Military Officer Lieutenant Colonel Danny Bustamante namahayag nga daw gibayaw sa kalangitan ang iyang kalioay sa daghan mibalik sa sabakan sa balaud sa Barangay Colosas.
Gipasabot usab niini ang Executive Order number 41 ni Davao City Mayor Inday Sara Duterte-Carpio nga nagtumong sa hapsay nga Kinabuhi ug panginabuhi sa mga Lumad diha sa kabukiran sa syudad sa Davao.
Dugang impormasyon sa katapusang adlaw sa Peace Building Seminar, gihimo usab ang Martsa alang sa Kalinaw, dayon ang programa diin mipadayag sa ilang kasinatian gikan sa kamot sa mga NPA ang tulo ka mga UGMO. Human niini mihatag ug mensahe nga pagsuporta ang 1103rd Infantry Brigade, Paquibato Police Station Commander ug daghan pang uban.
Sa pikas bahin, ang Barangay Kapitan sa Colosas misaysay usab sa iyang kasinatian sa kamangtas sa komunistang NPA diin gipatay niini ang iyang mga ginikanan. Samtang nangalagad isip Barangay Kapitan, nahitabo usab nga giambush siya sa mga NPA kauban ang iyang mga barangay police nga igo lamang mirespondi sa giingong kawatan sa barangay.
Kahinumduman nga labing una usab sa mga barangay sa tibuok Paquibato District nga nagdeklara ug Persona Non Grata batuk sa CPP NPA NDF ang barangay Colosas pinaagi sa gilasar ug gilagdaang Resolusyon sa Barangay Council.
(DPAO 10th ID/ OIC Michael Manguhig, RPN DXKT Davao)