Gibana-banang ₱ 8.7 milyones nga kantidad sa marijuana gikan sa duha ka plantasyon ang gipanglarot atol sa operasyon sa mga otoridad, sa Barangay Kalaungan , Lungsod sa Asturias, Pebrero 24, 2021.
Ang operasyon gilangkuban sa Cebu Provincial Police Office( CPPO), Provincial Intelligence Unit, Provincial Mobile Force Company, Philippine Drug Enforcement Agency (PDEA)-7.
Alas 10:30 kagahapon sa buntag gipang-ibot ang 10,500 ka mga ponoan sa marijuana nga gibana-banang mobalor ug ₱ 4.2 milyones gikan sa 650 square meter nga luna.
Unang naka ibot ang mga operatiba pagka alas 7:20 sa buntag ug 11,250 ka mga ponoan sa marijuana nga mobalor ug ₱ 4.5 gikan sa 800 square meter nga gitamnan niini.
Gitumbok ni Police Lieutenant LIno Galvan III, deputy chief sa PIU, nga ang mga cultivators o ang mga nananom sila si Jay-ar Camaogay ug si Johnny Escarpe alyas Yungko.
Miikyas sila si Camaongay ug si Escarpe human maka bantay nga dunay nagsingabot nga mga law enforcers sa ilang lugar.
Gitakdang pasakahan ug kasong kalapasan sa Section 16, Article II sa Republic Act 9165 ang duha ka suspetsado. (Jhon Tadlip/JTY)
(News & photo courtesy of PDEA Regional Office VII)