Cebu City – Usa ka residente sa Syudad sa Sugbo mipasaka ug reklamo sa Office of the Ombudsman Central Visayas batok sa opisyal sa syudad aron ipa imbestiga ang alegasyon labot sa giingong irregularities sa rental sa vans ug jeeps.
Ang nahisgutang mga van ug mga jeeps nga gi-abangan sa syudad maoy gisakyan sa mga health workers ug mga residente sa syudad sa pandemic.
Ang private complainant mipasangil ni City Administrator Floro Casas Jr. ug grave misconduct sa ‘overprice’ rental nga moabot ug 373 ka mga van ug jeepney.
Basi sa reklamo ₱ 5,500 kada unit, matag adlaw ang abang o mo sumada ug ₱ 48.9 million sa tibook duration sa kontrata.
Gikompara ang presyo matag unit sa Syudad sa Lapu-Lapu nga miabot lang ug tag ₱ 2,166.67 per day matag unit.
Gikwestyon sa complainant nganong mahal ang rate sa abang nga ang demand sa transportasyon down man.
Subay niini, maka abang unta ug mas mabarato kay sa presyo sa kontrata sa syudad.
Dugang gi kwestyon sa reklamante kung nganong wala gamita ni Casas ang mga government owned bus kung boot gyud nga maka daginot sa mga gastohan.
Isip tubag, matod ni Cebu City Administrator Floro Casas, Jr., nga wala siya mahadlok sa charges nga gisang-at batok kaniya diha sa Office of the Ombudsman.
Gibarugan ni Casas nga ang syudad misunod sa procurement process sa pag-abang sa mga vans.
“Wala tay angay kahadlokan kay nagsunod ta sa saktong procurement,” mensahi ni Casas.
(News & photo courtesy of Office of the Ombudsman Central Visayas | Cebu City Administrator)
