El Western Mindanao Command (Westmincom) ya inicia cambio na liderato del uno del mga oficina del mando base na Campo Navarro, Barangay Calarian, ciudad del Zamboanga, asegun con el militar del Sabado.
Con Coronel Allen Van Estrera ya instola como el nuevo Subjefe del Estado Mayor del Comando Unificado de Operaciones del Westmincom.
Asegun con el Westmincom, si Estrera ya releva con Tiniente Coronel Joseph Aldanese quien ya servi como el interino Subjefe del Estado Mayor del Comando Unificado de Operaciones desde Julio 3, 2024 hasta Agosto 2, 2024.
Si Aldanese esperansao asumi mayor responsibilidad como official superior na Departamento de Defensa Nacional.
Na su mensaje, si Aldanese ya expresa su gratitud con el mando del Westmincom, particularmente con el oficina del Subjefe del Estado Mayor del Comando Unificado de Operaciones donde ta servi le como el diputado por mas de un año y despues como el interino jefe.
Mientras tanto, si Estrera ya habla cay humilde le por el oportunidad para queda parte del Estado Mayor del Comando Unificado del Westmincom.
Ya promete tamen si Estrera para continua el cosa ya comensa su predecessor.
El ceremonia del cambio del jefe de oficina, que ya conduci del Viernes na Campo Navarro, ya encabesa si Coronel Emmanuel Cabasan, el Jefe del Estado Mayor Comando Unficado.
Por parte de Tinienete General William Gonzales, el comandante del Westmincom, si Cabasan ya expresa su apreciacion y admiracion con el dos honrao estimados oficiales superiores durante el ceremonia.
Ya presenta tamen si Cabasan el premio de Medalla de Merito Militar con Aldanese durante el ceremonia.
El ceremonia del cambio de jefe de oficina es un tradicional manera de traferida de autoridad y responsibilidad desde con un official para na otro. (B. Garcia)