Ta continua tene buen resulta el campanya del govierno encontra na proliferacion del mga armas de fuego o pusil sin licensia aqui na Mindanao.
Del Lunes, mga vivientes del 15 barangays na municopio del Talayan na provincia del Maguindanao del Sur voluntaryamente ya rindi de ila mga pusil de diferente calibre con Tiñente Coronel Tristam Tolentino, el interino comandante del 2nd Mechanized Infantry Battalion.
El ceremonya del entrego del mga pusil sin licensia ya ase na “Covered Court” del Talayan que ya encabesa el alcalde Datu Tungkang Midtimbang del mencionao municipio.
Con el mga pusil sin licensia ya presenta con Brigadier General Oriel Pangcog, comandante del 601st Infantry Brigade na presencia de Police Major Zukarnain Kunakon, el hefe del pulisiya del Talayan y mga oficiales del barangay y consejo del municipio.
El mga pusil sin licensia ya rindi mga vivientes del 15 barangays de Talayan ta incluwi dos rocket-propelled grenades, sinco .9-millimeter (MM) Uzi sub-machineguns, un riple .9—m ultimax, two shotguns, dos 40-mm M-79 grenade launchers, un 40-mm M203 grenade launcher, un calibre .38 pistola, and mga bala de diferent calibre.
Myentrastanto, si Tiñente Heneral Roy Galido, el comandante del Western Mindanao Command, ya habla cay ta intensifica sila de ila esfuerso para convinci con mga vivientes que rindi o entrega na otoridad de ila pusil sin licensia. (B. Garcia, photo courtesy of 601st Infantry Brigade)