Dos personas, incluido un elejido oficial, el ya muri mientras dos otro el ya iri y uno el salvao na un incidente de emboscada na provincia del Maguindanao del Sur, asegun con el policia del Sabado.
Asegun con el policia, el incidente ya ocuri mga alas 5 del Viernes tarde na Sitio Linao, Barangay Pandan, South Upi, Maguindanao del Sur.
El policia ya nombra con el dos muerto victimas como si Roldan Benito, el vice alcalde del South Upi, y de suyu subrino identificao lang como un tal Marcos.
Irido el esposa de vice alcalde identificao como si Analyn, el barrio capitana del Barangay Pandan.
El policia nohay mas identifica con el otro irido victima, el 11 años anak del man maridable Benito.
Otro anak del man maridable Benito que tiene el edad de 13 años salvao na incidente de emboscada.
Base na investigacion, el mga victimas abordo na un vehiculo que ta viaja na un montenoso lugar cuando ya embosca canila el mga desconosidos armao personas.
Asegun con el policia, si Benito y su subrino ya muri na hospital. El mga irido victimas admitido na hospital para el tratamiento medical.
El mga autoridad ta ase ahora enbuscada con el mga suspechao, quien enseguidas ya escapa despues de incidente.
El Police Regional Office-Bangsamoro Autonomous Region fuertemente ya condena con el incidente de emboscada y ya extende condolencia con el mga familiares del mga victimas. (B. Garcia)