Un lancha de palo el ya kema mientras pundiao na varadero aki na ciudad de Zamboanga, asegun con el Zamboanga City Fire District (ZCFD) del Sabado.
Asegun con Superintendent Christopher Morales, ZCFD marshal, el kema ya principia mga 11:48 del Viernes denoche na varadero na Barangay Recodo, en este ciudad.
Si Morales ya nombra con el varco que ya kema mientras pundiao na varadero como el M/L Nurkisa.
Asegun con Morales un “tugboat” ya hala con M/L Nurkisa para na mediania del mar para evita que man umid el losdemas varco pundiao na varadero.
Asegun con Morales, el mga bombero con el suporta del personajes del Coast Guard y Navy ya apaga con el fuego que ya alcansa na primer alarma.
Asegun con Morales, con el fuego ya puede controla maga 12:35 del Sabado aga y completamente ya puede apaga mga alas 8:20 del aga del mismo dia.
Si Morales ya habla ta precura pa sila determina el origin del fuego y el valor del destroso de propiedad. (B. Garcia, photo courtesy of ZCFD)