El gobierno local, por medio del Oficina de Salud de Ciudad, ya distribui P71 millones Health Emergency Allowance (HEA) con 1,600 “frontliners” y tabajadores de salud del gobierno local.
El Alcalde John Dalipe, quien ya supervisa con el distribucon del HEA, ya habla del Lunes cay el mga recipientes amo aquellos quien ya servi durante el periodo de pandemia de Covid-19.
Asegun con Dalipe, el HEA es base na exposicion de peligro bajo’l directiva del Departamento de Salud: alto el peligro, P9,000 cada mes; moderato el peligro, P6,000 cada mes; y, bajo el peligro, P3,000 cada mes.
Asegun con Dalipe, el mga trabajadores de salud ta merece recivi beneficio por pone’r en peligro de ila vida para salva con el mga gentes desde’l Covid-19 durante el pandemia.
El otro mga beneficiarios ya recivi de ila HEA por medio del de ila cuentas del automated teller machine (ATM).
Acordando, el Departamento de Salud ya dale del Agosto 6 el ultimo parte del sin pago de HEA del Covid-19 para del 2,117 trabajadores de salud del ciudad na cantidad de P148 millones del Agosto 6 por medio del intervecion de Dalipe.
El fondo intendido para el restante 19 meses que nohay pa paga con el mga trabajadores de salud, ta inclui mga contratao empleyados, trabajadores de salud de barangay y aquellos asignao na mga facilidad de isolamento.
El mga meses nohay pago ta cubri Julio hasta Deciembre 2021, Julio hasta Deciembre 2022, y Enero hasta Julio 2023.
El pago del HEA es base na Ley de Republica 11712 que ta dale beneficio y subsidios con mga trabajadores de salud publico y privado durante el pandemia de Covid-19 y otro emergencias de salud publico na futuro. (B. Garcia)