Un “team leader” del New People’s Army (NPA) ya rindi na autoridad y ya entrega dos riple de alta calibre na provincial del Misamis Occidental, el militar ya anuncia del Domingo.
Asegun con el 102nd Infantry Brigade el team leader del NPA quien ya rindi ya conose como si Ardonel Dagohoy alias Ka Makoy del “Guerilla Front Sendong”.
Si Dagohoy ya rindi con el mga tropa del 10th Infantry Battalion (IB) y ya entrega dos riple AK-47 na Barangay San Juan, Panaon, Misamis Occidental del Viernes.
Si Dagohoy ya decidi rindi despues del encuentro entre mga soldao y NPA na Barangay Carmen, Jimenez, Misamis Occidental del Octubre 26 que ta resulta na muerte de Michael Cabayag alias Ka Teddy y el capturada de Armida Nabicis alias Ka Yumi.
Si Tiniente Coronel Jose Andre Monje, el comandante del 10IB, ya dale el aseguramiento cay ay extende sila suporta con Dagohoy, incluido ayuda pormedio de poner conele bajo del programa del govinerno nombrao como el Enhanced-Local Integration Program (E-CLIP).
Si Brigadier General Elmer Suderio, el comandante del 102nd Infantry Brigade, ya expresa su apreciacion con Dagohoy hablando su decision ya privini tragedia como el cosa ya pasa con Cabayag, quien ya muri na encuentro contra con mga soldao. (B. Garcia)