Un persona markao como “Street Level Individual (SLI)” el ya aresta mga autoridad na un campaña contra droga ilegal aqui na ciudad de Zamboanga, asegun con el policia local del Jueves.
Asegun con el policia local con el suspechao ya aresta na un “buy-bust operation” mga alas 2:41 del Jueves aga na Zone 6B, Barangay Cawit, en este ciudad.
El policia ya nombra con el arestao suspechao como si alias Black, 44 años el edad y residente de Barangay Sinunuc, en este ciudad.
Asegun con el policia ya puede confisca na posesion de Black 6.7 gramos de suspechao shabu que tiene el valor de P45,560, P200 markao sen, un bag, y un celpon.
Detenido ahora el suspechao en preparacion para el plantada del formal asunto contra conele por violacion del “Comprehensive Dangerous Drugs Act of 2002”. (B. Garcia)