Ya aresta con un rebelde New People’s Army (NPA), quien tiene pendiente asunto criminal na jusgado del municipio de San Miguel na provincia del Zamboanga del Sur.
Ya nombra si Police Lieutenant Colonel Helen Galvez, el portavoz del mando pulisiya rehyonal, con el arestao rebelde NPA como si Jeremias Balolongo, Sr., 61 años el edad.
Asegun con Galvez cay con Balolongo ya aresta mga pulis mga alas 9:34 del Miyercoles aga na Sitio Spur 1, Barangay Titulok, Bagumbayan, Sultan Kudarat.
Si Galvez ya habla cay si Balolongo tiene pendiente orden de aresto por el crimen de “multiple frustrated homicide” con P200,000 recomendao piansa ya dale el jugado del San Miguel, Zamboanga del Sur del Junyo 25, 2014.
Asegun con Galvez cay si Balolongo un myembro del antes “Guerrilla Front KARA” del NPA que ta opera na mga municipio del San Miguel y Lakewood Zamboanga del Sur.
Con Balolongo ya aresta el combinao personajes del pulisiya del Lakewoood, Zamboanga del Sur y del Bagumbayan, Sultan Kudarat con el suporta del otro mga mando del pulisiya.
Si Balolongo amo el aka 18 myembro del NPA que ya aresta mga otoridad na rehyon desde’l año 2022. (B. Garcia, photo courtesy of Police Regional Office 9)