Dos personas ta transporta gasolina sin documentos el ya aresta mga otoridad na costa weste aqui na ciudad de Zamboanga.
Si Police Major Ramon Aquiatan, Jr., el hefe del Zamboanga City Police Station 10 (ZCPS10), ya nombra con el mga arestao personas como si Ramjan Mandi, 41 años el edad y su uban si Ameir Ibañez, 17 años, ambos mga residentes de Barangay Jatian, Sibuco, Zamboanga del Norte.
Asegun con Aquiatan cay ta conduci sila “checkpoint” cuando ya ase sila para con un trak ta maneja si Mandi para inspecciona.
Durante el inspeccion, asegun con Aquiatan cay ya descubri sila el trak tiene ta carga 7 galon ta contene 210 litros de gasolina con el valor de P14,700.
Enseguidas ya aresta con Mandi y su uban y ya confisca con el 7 galon de gasolina despues que ya falya sila dos presenta documento sobre el de ila carga.
Asegun con Aquiatan cay el transportada de gasolina sin propio documentos es un violacion del “Fire Code of the Philippines of 2008”.
Si Mandi, su uban, el trak y el gasolina ya pone bajo na custodiya del ZCPS10 y ay entrega canila na “Bureau of Fire Protection” para el propio disposicion. (B. Garcia, photo courtesy of ZCPS 10)