Ya aresta con el uno del dos suspechao na un incidente de tiroteo que ya ocuri del Jueves na Sitio Trapitchu, Barangay La Paz, este ciudad, el pulisiya local ya anuncia del Sabado.
El Zamboanga City Police Station 9 (ZCPS9) ya nombra con el arestao suspechao como si Renato Alejandro, 35 años el edad y residente de Sitio Pole Grande, Barangay La Paz.
Con Alejandro ya aresta na un “follow-up operation” mga alas 11:10 del Viernes aga na Sitio Pole Grande, Barangay La Paz, en este ciudad.
Asegun con el ZCPS9 cay si Alejandro uno del dos suspechao quien ya tira con Reiner Ramos, 13 años el edad, mga alas 10:10 del Jueves denoche na Sitio Trapitchu, Barangay La Paz. Admitido na hospital el victima.
Asegun con el ZCPS9 ta continua el enbuscada para aresta con el otro suspechao conosido como si Popoy Ventura, un residente Tambien del Sitio Pole Grande, La Paz. (B. Garcia)