El mga autoridad ya aresta tres gente, incluido un pulis y personajes del Guardia Costera del Pilipinas o PCG, y ya confisca valor de P13.6 millones droga ilegal na un campaña contra droga na ciudad de Zamboanga, asegun con el policia del Jueves.
Si Coronel Romeo Espero, Jr., el deputy regional director for operations (DRDO) del Police Regional Office-9 (PRO-9), ya identifica con el mga arestao suspechao como canda Staff Sergeant Siddih Aliuddin Jr., 44; Seaman First Class Mohammad Abbas, 30; y, si Mardie, el esposa de Aliuddin y hermana de Abbas.
Si Aluiddin asignao na Regional Headquarters Service Unit del PRO-9 mientras si Abbas asignao na Estacion de Guardia Costera na ciudad de Isabela, provincia de Basilan.
Asegun con Espero, con el mga suspechao ya aresta na un operacion de compra busto que ya conduci el mga personajes del Regional Drug Enforcement Unit-9 (RDEU-9) mga alas 2:45 del Miercoles tarde na carretera del Maria Clara Lorenzo Lobregat, Zona 6, Barangay Boalan, ciudad de Zamboanga.
Asegun con Espero, ya confisca na posesion del mga arestao suspechao dos kilos de suspechao shabu que tiene el valor de P13.6 millones, balutan de 899 pedaso de P1,000 “boodle money” que ya pone insima un real P1,000 markao dinero, boslo plastico, y un coche.
El mga arestao suspechao ya alega cay el de ila droga ilegal estaba na provincia de Tawi-Tawi.
Si Espero ya habla, con el mga arestao suspechao ya detene na quartel del Zamboanga City Police Office en preparacion para el plantada de caso contra canila por violacion del Ley Integral de Drogas Peligrosas del 2002.
El operacion de compra busto ya conduci el RDEU-9 con el suporta del inteligencia del fuersa naval bajo el supervision de Espero. (B. Garcia)