Cuatro personas, incluido un pulis y un mujer, el ya aresta y ya confisca valor de P13.6 millones droga ilegal el mga autoridad na un operacion contra droga na provincia del Sulu, asegun con el policia del Viernes.
Si Gil Cesario Castro, el director del Philippine Drug Enforcement Agency-Bangsamoro Autonomous Region in Muslim Mindanao (PDEA-BARMM), ya identifica con el mga arestao suspechao como canda Police Staff Sergeant Moh Radja Ismula, 49; Andam Alidjam, 65; Midarmi Alidjam, 44 y un mujer; y, si Rahsi Jallaw, 54.
Asegun con Castro, con el mga suspechao ya aresta na un operacion de compra busto del Jueves denoche na Barangay San Raymundo, Jolo, Sulu.
Si Castro ya habla, ya confisca na posesion del mga arestao suspechao dos kilos de suspechao shabu en paquetao na dos termosellada transparente sobrecitos plastico que tiene el valor de P13.6 millones, dinero de compra busto, dos celpon, tarjetas de identificacon, recivo de banco, y un motorciclo.
El mga arestao suspechao temporaryamente ya detene na quartel del policia na municipio de Patikul en preparacion para el plantada del caso contra canila por violacion del Ley Integral de Drogas Peligrosas de 2002.
Asegun con Castro, el exitoso operacion es resulta del activo supporta del policia y National Intelligence Coordinating Agency.
“Ta comenda yo con todo’l operativas que exitosamente ya previni el intento distribui gran volumen de droga ilegal na Sulu que puede destrosa el vida del mucho gente,” si Castro ya habla. (B. Garcia)