Un potencial miembro del un grupo armado privado el ya rendi na autoridad na ciudad de Isabela, el capital del provincia del Basilan, asegun con el policia del Jueves.
El mando regional del policia, o Police Regional office-9 (PRO-9), nohay nombra con el rendidor por razones de seguridad puera lang de habla’r el persona quien ya rendi tiene el edad de 24.
Asegun con el PRO-9, el potencial miembro del un grupo armado privado ya rendi mga alas 11:30 del Martes aga na Barangay Sunrise, ciudad de Isabela.
Asegun con el PRO-9, el rendidor tiene coneccion na conflictos de tribo o mas referido comon como el “rido” na municipio de Sumisip, Basilan, que ya principia del año 2019.
Ademas, el policia ta cre cay el rendidor tiene afiliaciones con un pandilla criminal como simpatizante del grupo Anjawani, que ta opera na region.
El mga oficiales del Barangay Lebbuh, ciudad de Lamitan, Basilan ya servi como mga testigo na rendida del potencial miembro del un grupo armado privado.
Asegun con el policia, el mga oficiales del Barangay Lebbuh ya hace un crucial papel na facilitacion de dialogo y fomentada compiansa entre mga autoridad y el comunidad. (B. Garcia)